सांस्कृतिक राजधानी असलेल्या पुण्यामधील वैभवशाली गणेशोस्तव जागतिक स्तरावर पोहचवण्यासाठी ग्लोबल गणेश फेस्टिवलचे आयोजन करण्यात आले आहे.यंदा फेस्टिवल चे हे दुसरे वर्ष असून
जगातील अनेक महोत्सवांपेक्षा गणेशोत्सव हा अधिक व्यापक व भव्यदिव्य स्वरूपाचा आहे. परंतु, या उत्सवाला म्हणावी तशी जागतिक स्तरावर ओळख मिळाली नाही. या उत्सवाचा पर्यटन केंद्र म्हणूनही मोठा विकास होऊ शकतो. परदेशी पर्यटकांना आकर्षित करण्यासाठी, त्यातून रोजगारनिर्मिती उभारण्यासाठी आणि आपला पारंपरिक व ऐतिहासिक गणेशोत्सव जगभर जाण्यासाठी 'ग्लोबल गणेश फेस्टिवल' आयोजित करण्यात येत आहे. फेस्टिव्हलच्या माध्यमातून जास्तीत जास्त आंतरराष्ट्रीय पर्यटकांपर्यंत पोहचणे हेच मुख्य ध्येय आहे. असे मत फेस्टिवलचे मुख्य समन्वयक अनिरुद्ध येवले यांनी व्यक्त केले.
भारतात, पर्यटन क्षेत्राचा जीडीपी आणि रोजगार या दोन्ही क्षेत्रात मोठा वाटा आहे. आर्थिक वर्ष 2024 मध्ये, पर्यटन क्षेत्राने जीडीपीच्या ५% योगदान दिले आणि अंदाजे ७.६ कोटी नोऱ्या दिल्या आहेत. पुण्यातील गणेशोत्सव जागतिक स्तरावर पोहोचल्यास परदेशी पर्यटक आणि पर्यटनाची महाराष्ट्र मध्ये मोठी वाढ होण्याची क्षमता आहे.
सार्वजनिक गणेशोत्सव एकतेचा आणि सामाजिक समतेचा उत्सव आहे. गणेश उत्सवाने अनेक यशस्वी राजकीय नेतृत्व घडवले आहे. गणेशोत्सव मंडळातील सामान्य कार्यकर्ते आज राज्य आणि देशात राजकीय नेतृत्व करीत आहेत. लोकमान्य टिळकांनी सामाजिक एकतेसाठी 1893 मध्ये सुरू केलेला गणेशोत्सव आज जागतिक स्वरूपाचा झालेला आहे. आज शंभरहून अधिक देशांमध्ये गणेशोत्सव साजरा होतो मात्र पर्यटनाच्या दृष्टीने अजूनही त्याकडे गांभीर्याने पाहिले जात नाही.ही बाब लक्षात घेऊन, २०२४ मध्ये राष्ट्रप्रथम ट्रस्ट, सदैव फाऊंडेशन आणि अमित फाटक फाऊंडेशन यांच्या वतीने आणि जय गणेश व्यासपीठाच्या समन्वयातून 'ग्लोबल गणेश फेस्टिव्हल' या लोकचळवळीची सुरुवात झाली.
या फेस्टिवल द्वारे जागतिक गणेश मंडळे व पुण्यातील गणेश मंडळांचा सामंजस्य करार घडवून आणण्यावर भर दिला जाणार आहे. यानिमित्ताने जागतिक स्तरावर विविध प्रकारच्या स्पर्धांचे आयोजन केले जाणार आहे. धार्मिक पर्यटन विकसित करण्यासाठी आवश्यक त्या पायाभूत सुविधा उभारण्याची गरज आहे. 'मोरया हेल्पलाईन'द्वारे परदेशातून येणाऱ्या पर्यटकांना धार्मिक स्थळांना भेटी देण्यासाठी सहकार्य केले जात आहे.अशी माहिती वैभव वाघ यांनी दिली. या प्रसंगी फेस्टिव्हलचे मुख्य समन्वयक अनिरुद्ध येवले, आंतरराष्ट्रीय समन्वयक धनश्री पाटील, समन्वयक महेश साने, कार्यकारी अधिकारी ऋषिकेश कायत, प्रसिद्धीप्रमुख जीवराज चोले, सांस्कृतिक प्रमुख प्रणव भुरे आदी उपस्थित होते.
