Pune
पुणे.दि.22: जिल्हा वार्षिक योजना (सर्वसाधारण) सन २०२५-२०२६ अंतर्गत पुणे जिल्ह्यातील मुळशी, भोर आणि जुन्नर तालुक्यात विविध विकासकामांसाठी निधी मंजूर करण्यात आला आहे.
शिवसेना नेत्या व विधानपरिषद आमदार डॉ. नीलम गोऱ्हे यांच्या पुढाकारातून या कामांना मंजुरी मिळाल्याने स्थानिक नागरिकांमध्ये समाधान व्यक्त होत आहे.
मुळशी तालुक्यातील जवळगाव येथे अंतर्गत रस्ता विकासकाम तसेच रस्ताळवाडी येथे स्मशानभूमी दुरुस्ती व शेड बांधकामासाठी निधी मंजूर करण्यात आला आहे. तसेच लवळे येथे सावता माळी मंदिराजवळील अंतर्गत रस्ता आणि भादस येथे विठ्ठल मंदिर ते धोंडीबा गावडे रस्ता विकासकामासाठी प्रत्येकी १५ लाख रुपयांचा निधी मंजूर करण्यात आला आहे.
भोर तालुक्यात खेड शिवापूर प्राथमिक शाळेकडे जाणारा रस्ता, खेड शिवापूर स्मशानभूमी वॉल कंपाउंड तसेच खानापूर येथे स्मशानभूमी संरक्षक भिंत बांधण्यासाठी प्रत्येकी १५ लाख रुपयांचा निधी मंजूर करण्यात आला आहे.
जुन्नर तालुक्यातील मौजे धनगरवाडी येथे धनगरवाडी-नारायणगाव-येडगाव शिवरस्ता विकासकामासाठी २० लाख रुपयांचा निधी मंजूर करण्यात आला आहे.
या विकासकामांमुळे ग्रामीण भागातील मूलभूत सुविधांमध्ये सुधारणा होणार असून दळणवळण, नागरिक सुविधा तसेच स्मशानभूमींच्या सोयीसुविधांमध्ये वाढ होणार आहे. ग्रामीण भागातील प्रलंबित प्रश्न सोडविण्यासाठी डॉ. गोऱ्हे सातत्याने पाठपुरावा करत असल्याची भावना स्थानिक नागरिकांनी व्यक्त केली.
याबाबत पुणे जिल्हा परिषद स्थायी समिती सदस्या सौ. रुपाली रमेशबाप्पू कोंडे, शिवसेना संपर्क प्रमुख बारामती लोकसभा मतदारसंघ कांताताई पांढरे, शिवसेना युवासेना पुणे जिल्हाप्रमुख श्री. निलेश राजेंद्र घारे, युवासेना जुन्नर तालुका प्रमुख विकास राऊत यांनी डॉ. नीलम गोऱ्हे यांचे आभार मानले. 'ग्रामीण भागातील विकासकामांना त्यांच्या माध्यमातून मोठी चालना मिळत असून सामान्य नागरिकांच्या प्रश्नांकडे त्या सातत्याने लक्ष देत आहेत,' असे त्यांनी सांगितले.
