News: बीड जिल्ह्यातील परळीतील महादेव मुंडे यांच्या हत्येला दोन वर्षे चार महिने उलटूनही अद्याप मुख्य सूत्रधार मोकाट असल्याचा आरोप करत राष्ट्रवादी काँग्रेस शरद पवार गटाचे प्रदेश सरचिटणीस राजाभाऊ फड यांनी गुरुवारी (5 मार्च) पत्रकार परिषदेत स्फोटक दावा केला आहे.
महादेव मुंडेंची हत्या तत्कालीन पालकमंत्री धनंजय मुंडे यांच्या सांगण्यावरूनच झाली, असा थेट आरोप राजाभाऊ फड यांनी केल्याने राजकीय वर्तुळात मोठी खळबळ उडाली आहे.
ब्रेन मॅपिंग आणि नार्को टेस्टचा हवाला
राजाभाऊ फड यांनी पत्रकार परिषदेत सांगितले की, या प्रकरणाचा तपास सध्या एसआयटीकडे (SIT) असून आयपीएस पंकज कुमावत यांच्या मार्गदर्शनाखाली चौकशी सुरू आहे. मात्र, तपासात राजकीय दबाव असल्याचा दावा त्यांनी केला. या प्रकरणातील आरोपींच्या ब्रेन मॅपिंग आणि नार्को टेस्टमध्ये आमदार धनंजय मुंडे यांचे नाव समोर आले आहे. त्यांच्या सांगण्यावरूनच ही हत्या करण्यात आली, हे आता स्पष्ट होत आहे, असे फड यांनी सांगितले.
120 बी अंतर्गत गुन्हा दाखल करून अटक करा
या हत्येचा कट रचल्याप्रकरणी धनंजय मुंडे यांच्यावर कलम 120 बी अंतर्गत गुन्हा दाखल करून त्यांना तात्काळ अटक करावी, अशी मागणी राजाभाऊ फड यांनी केली आहे. वेळीच कारवाई झाली असती, तर पुढे सरपंच संतोष देशमुख यांची हत्या झाली नसती, असेही फड यांनी यावेळी नमूद केले. तुम्ही परळीतील 10 लोकांना संपवले आहे, माझ्याकडे त्या सर्वांची नावे आणि पुरावे आहेत," असा गंभीर इशाराही त्यांनी यावेळी दिला
20 मार्चपर्यंतचा अल्टिमेटम
प्रशासनाने या प्रकरणातील सत्य महाराष्ट्रासमोर आणावे, अन्यथा 20 मार्चनंतर मृताच्या माहेरच्या आणि सासरच्या मंडळींच्या वतीने तीव्र आंदोलन छेडण्यात येईल, असा इशारा देण्यात आला आहे. तसेच, एसआयटीला या दबावाखाली तपास करता येत नसेल, तर हे प्रकरण सीबीआयकडे (CBI) सोपवण्यात यावे, अशी मागणीही फड यांनी लावून धरली आहे.
महादेव मुंडे हत्या प्रकरण नेमके काय आहे?
दोन वर्षांपूर्वी परळीत महादेव मुंडे यांची हत्या करण्यात आली होती. या प्रकरणात अद्याप मुख्य आरोपींना शिक्षा झालेली नाही, असा आरोप मृताच्या नातेवाईकांकडून केला जात आहे
राजाभाऊ फड यांनी धनंजय मुंडे यांच्यावर काय आरोप केले आहेत?
आरोपींच्या नार्को टेस्ट आणि ब्रेन मॅपिंगमध्ये धनंजय मुंडे यांचे नाव आल्याचा दावा करत, त्यांच्या सांगण्यावरूनच ही हत्या झाल्याचा आरोप फड यांनी केला आहे.
Beed News: महादेव मुंडे हत्या प्रकरणात मोठी अपडेट, दोघांची नार्को टेस्ट, एकाची ब्रेन मॅपिंग होणार
सध्या या प्रकरणाचा तपास कोण करत आहे?
मुख्यमंत्री महोदयांच्या आदेशानुसार स्थापन झालेली एसआयटी (SIT) टीम आयपीएस पंकज कुमावत यांच्या नेतृत्वाखाली या प्रकरणाचा तपास करत आहे.
आंदोलनाचा इशारा का देण्यात आला आहे?
येत्या 20 मार्चपर्यंत जर मुख्य आरोपींवर कारवाई झाली नाही किंवा गुन्हे दाखल झाले नाहीत, तर तीव्र आंदोलनाचा पवित्रा राजाभाऊ फड आणि मृताच्या नातेवाईकांनी घेतला आहे.
